Rock uit met Dinsdagram

Vandat ek vir die eerste keer ‘For Whom the Bell Tolls’ van Metallica gehoor het, het my musieksmaak verander. Ek het in die laerskool bietjie na Nirvana geluister wanneer ek by my vriende met die cool ouers was. Selfs ‘n paar keer na ‘The Beautiful People’ van Marilyn Manson! Daai dae, ek praat nou laat 90’s, was sulke musiek duiwels. Veral as jou Pa in die weermag was en jou verbied het om ook ‘n step of god forbid ‘n UNDERCUT soos die cool kinders te kry. Eks nou bly dat daar nêrens ‘n foto van my met ‘n step is nie, maar nogsteeds.

Terug by die metal. Deesdae het mens die opsie om meeste van die bekendes op Twitter of Instagram te “volg”. My idee was om ‘n paar van die groot metal bands te soek op Instagram en voor te stel dat hulle deur julle metal outjies gefollow word, maar ek het tot ‘n beseffing gekom wat ek gevolglik sal deel.

Metallica – @metallica

Kom ek begin deur te sê Metallica is die rede hoekom ek begin Metal luister het.  Ek het ook begin kitaar en dromme speel op Metallica, en ek het elke album meer as een keer gekoop.  Die hele Napster storie het my ‘n bietjie teleurgestel.  Hulle was van die eerste regte groot bands wie hul plate by shows weggegee het en nie “sell-outs” wou wees nie. En moenie vir my sê hulle sukkel met geld nie, so hoekom die bakleiery teen die deel van musiek?

Op die account kan jy sien waarmee hulle besig is meeste van die tyd.  Mens kan ook sien hulle raak oud, shame. Hulle het die wêreld ‘n moerse guns gedoen deur musiek te maak.  Jy kan vir Kirk Hammett (die lead guitarist) follow by @kirkhammett en indien jy nie Metallica ken nie, is jy net pleinweg baie jonk of weird. Jy kan Metallica volg by @metallica.

In Flames – @inflames

Legendariese metal band van Swede af.  Hulle was ‘n paar jaar gelede in Suid-Afrika en die show was ongelooflik goed.  Hulle Instagram is nie te indrukwekkend wat clips en lekker persoonlike fotos (want dis seker maar die doel van iemand op Instagram volg) betref nie.  Baie merchandising en toere en so aan, wat seker maar ook op hul website te vinde is.

Maak nie saak watse fotos hulle post nie, hulle is legends en aan die gang vir 26 jaar so verseker worth a listen. Jy kan Inflames volg by @inflames.

Lamb of God – @lambofgod

As jy enigsins respek het vir kunstenaars wie hul instrumente absoluut bemeester het, is hierdie die band vir jou.  Jy moet ook nogals hou van hardcore musiek, want die ou growl die heeltyd.  Hy is ook aangewys as een van die beste “growlers” daar buite. As ek hul musiek kortliks moes beskryf sou ek sê dis “full blown, hardcore, balls to the wall head-banging groove metal”. Hul Instagram bevestig dit, alles gaan oor live shows, guitars en lang hare wat headbang. Dis hoe dit hoort.

Die vocalist, Randall Blythe, kan jy volg by @drandallblythe.  Moenie enigiets Lamb of God related hier soek nie.  Hy is ‘n artist op verskeie manier, hoor.  Soos hy self sê in sy bio:  “My photos here, not my music. Order photo book below⬇️”.  Dit lyk my as jy kan fotos neem met ‘n relatiewe duur kamera en lens, en dit dan edit sodat dit swart en wit is, is jy ‘n fotograaf.

J kan Lamb of God volg by @lambofgod.

Slipknot – @slipknot

Die berugte 9 piece waarvan ons ouers se nagmerries gemaak is.  Slipknot se musikale vermoë is volgens my baie seergemaak deur hul image.  Hulle het gegaan vir shock value en dit heel goed reggekry.

Hul drummer, Joey Jordison, is ongelooflik alhoewel hy intussen vervang is.  Die twee guitarists is ver bogemiddeld, en Corey Taylor is ‘n baie veelsydige sanger.  Wat die ander betref – die bassist is average.  Sid die DJ is seker ok, nie wat ek sal noem ongelooflik nie.  Die twee hansworse wat die dromme met baseball bats bliksem is maar net daar om die stage vol te maak en by goed af te spring dink ek.

Jy kan Slipknot volg by @slipknot.

Iron Maiden – @ironmaiden

In terme van longevity is daar nie veel wie kersvashou by Iron Maiden nie.  Hulle is al aan die gang van 1975 af, en alhoewel hulle nou en dan vir ‘n jaar of twee ‘n ander lid gehad het is hulle dieselfde klomp manne en om vir 41 jaar aan die bokant van die musiekbedryf te wees is iets om oor trots te wees.

Die frontman, Bruce Dickenson, raak nou op die 7de Augustus 58.  As jy hom nou onlangs live in Suid-Afrika beleef het sou jy baie verbaas wees om te sien hoe iemand wie so oud of ouer as jou Pa is soveel energie het.  Die enigste soortgelyke energieke oubaas frontman wie ek al gesien het is Bruce Springsteen.

Gaan kyk gerus na hul Rock in Rio show.  Die show is in 2001 in Brazil gehou en is gespeel voor rofweg 250,000 mense.  Die ergste is dit is die 2de grootste skare waarvoor hulle al gespeel het.  By 1985 se Rock in Rio, ook in Brazil, was daar 300,000 mense. Gaan volg vir Iron Maiden by @ironmaiden.

Volg vir Stix by @gevaaalikdotcom en vir my by @sventasties.  Los comments en laat weet van lekker Instagram accounts wie ons kan volg.  Asb geen selfies en niks fotos van mense wie hul eie abs afneem in die spieël nie.