Bobby en Karlien van Jaarsveld maak Paris Hilton na in aandagvraat TV program

Ai, Bobby en Karlien van Jaarsveld, ai. Die lewe van Afrikaanse-popsterre het almal ‘n storie en daardie storie bestaan meestal uit aandag soek van ander mense af, ‘n konstante gesoek na goedkeuring van mense wat jou nie eers ken nie. Karlien ‘Aandagvraat’ van Jaarsveld en haar boeta Bobby ‘Dis ‘n Tottie’ van Jaarsveld gaan doen wat enige aandagvrate in die moderne era sou doen: ‘n Reality TV reeks begin.

Moet my nie vra wat die program se naam gaan wees nie, ek gee nie genoeg om om uit te vind wat die naam van die nuutste aandagsoekery is nie. Wat ek jou wel kan vertel is dat net soos met die van Jaarsveld se musiek is daar geen kreatiwiteit hier nie. Hulle kon nie eers deur die moeite gaan om aan hul eie premise uit te dink vir hulle program nie, hulle het sommer by die vlymskerp Paris Hilton en haar dom-blond vriendin Nicole Richie se The Simple Life idee gesteel en gehoop niemand sal agterkom nie.

Hoe slim is jy as jy ‘n program namaak wat in elk geval net 3.8 sterre uit 10 kon kry volgens IMDB? Wanneer dit by die van Jaarsveld kroos kom, dink ek kan jy daardie vraag self beantwoord.

Dit is reg Bobby van Jaarsveld en Karlien van Jaarsveld gaan maak asof hulle allerdaagse mense is deur allerhande takies te doen soos wat ons plebs moet. Wat ek dink hulle voor mik is dat mense sien hoe hulle werk vir hul geld soos die res van ons, dan vergeet ons miskien dat hulle geld maak deur aandag te soek by vreemdelinge. Natuurlik sal die program ook wys op ‘n kanaal wat uit is daarop om Afrikaners so onnosel te laat lyk as wat hulle kan: Via TV.

Jip, Via is nou die vertraagde klein boetie van Kyknet. Basies die gatkantkanaal van Afrikaans TV, asof Afrikaners regtig laer kan daal as Kyknet TV. Moet dus glad nie verbaas wees as trokvragte vol “Afrikaners” inteken om te kyk hoe Bobby en Karlien van Jaarsveld maak asof hulle al ‘n dag se werk in hul hele lewens gedoen het.

Bobby en Karlien van Jaarsveld trek voordeel uit die breinlose gehoor

Fokofpolisiekar het dit goed gestel: “Ons almal bou saam aan Afrikaanse-Amerika”.

Bobby en Karlien van Jaarsveld het dus besluit om ‘n Amerikaanse TV program se idee te gaan steel en dit oor te doen in Afrikaans terwyl hul hoop dat die breinlose gehoor nie agterkom nie. Hoeveel van die breinlose Via TV gehoor gaan die program kyk? Seker nie veel nie, en met TV is dit moeilik om werklik te bepaal hoeveel mense ‘n program kyk, anders as op die internet waar almal heel duidelik kan sien hoeveel mense het al jou YouTube video gekyk.

Ek het twee dinge wat ek wil voorspel oor Bobby en Karlien van Jaarsveld se onoorspronklike TV program:

1. Daar gaan vir ons vertel word dat die program moerse suksesvol was en dat almal wat Afrikaans al gepraat het ooit dit gekyk het en sal aanhou kyk tot in einde van dae, al sal hulle nooit kan bewys dat die program regtig deur enige mense met ‘n IK bo 10 gekyk is nie.
2. Die eerste episode gaan begin met Karlien wat vreeslik hartseer is as sy haar kinders moet groet voor sy gaan “werk vir haar geld”. Sy is mos so vreeslik bekommerd oor die privaatheid van haar kinders. (Lees daardie laaste sin met ‘n vet sarkastiese stemtoon)

Wie blameer ons vir Bobby en Karlien van Jaarsveld en hoe hulle is?

Onthou dat almal as ‘n baba gebore word en dat ons dan gevorm word deur ons ervarings soos ons deur die lewe gaan. In Bobby en Karlien van Jaarsveld se geval is hul ma die een wat hulle verander het in mense wat dink ander moet van jou hou voor jy ‘n ryk lewe kan hê. Darem is hul ma, Ronel Brink, nou ryk want sy is mos albei die van Jaarsvelders se “bestuurder”. Miskien moes ek ‘n derde punt by my voorspellings vir die tos-program bygesit het: Karlien en Bobby se ma sal ook gesig wys op die van Jaarsvelders se program “al haaaat sy foto’s”, want aandagvraat keweek aandagvraat.