Afriforum het geen respek vir privaatheid nie

Blykbaar was daar een of ander tyd ’n byeenkoms by die Voortrekkermonument. Dit is hoekom ek nou 08:30 op ’n Dinsdagoggend op die foon is. Ek hou nie van praat op die foon nie. Veral nie met vreemdelinge nie. Dit is ’n “sales call” – van Afriforum, nogal.

Dit sal nou die tweede keer wees wat Afriforum my bel binne die afgelope min of meer ses weke.
“Ek is *Mongolied van Afriforum. Ons skakel u vandag in verband met die sportskwotas in Suid-Afrikaanse sport.”

“Dankie, maar ek stel nie belang in sport nie en ook nie in die kwotasisteem nie.” Ek kan nie glo ek moet vir iemand lieg net om hulle uit my hare te kry nie. Ek kan nie glo ek het sopas die woorde “kwotasisteem” en “dankie” in dieselfde sin gebruik nie.

Is moord ‘n sport vir Afriforum?

“O, so jy gee ook nie om oor plaasmoorde nie?”

Ek was eers stomgeslaan. In my kop het ek probeer om Mongolied se denkwyse te verstaan. Ek wou weet watse paadjies sy moes volg om daardie twee sake bymekaar te bring.

My mond gaan na so ’n paar sekondes oop. Ek voel soos ’n drukkoker soos ek die stroom vloekwoorde moet terughou: “Hoe om gotsnaam het jy nou verstaan dat ek nie omgee oor sportskwotas nie en dus ook nie oor moord nie?”

In my gedagtes sien ek vir Mongolied in die badkamer by een of ander Centurion-kuiergat besig om lyne kat van die toiletbak af te doen.

“Ek is jammer ek mors jou tyd met goed waaroor jy nie omgee nie,” spoeg sy die woorde blitsvinnig uit. Dit drup van aannames en haat. Geöefen om my te haat oor goed wat sy aanneem.

Mongolied probeer my boelie en verkleineer, oor die foon. Ek het beledig gevoel; sy het my immers gebel. Noudat Mongolied se masker afgeval het, wil sy net in ’n grot in hol voor die son haar verbrand, en net die oproep beëindig.

“Nee, wag ’n bietjie. Jy het my gebel om te praat. So kom ons praat. Jy gaan nie nou die foon net in my oor neersit nie, gaan jy?”

“Ek wil niemand se tyd mors nie.”

“Great. Heel eerste kan jy dan sommer keer dat jy ooit weer my tyd mors deur my naam van julle lysie van ‘mense wat omgee’ af te haal. Dan kan jy my vertel waar jy my nommer gekry het.”

’n Paniekerige stilte is skielik aan haar kant van die foon.

“Ons kry ons nommers direk van hoofkantoor af.” Aan ’n vaer antwoord kon ek self nie dink nie. Ek is seker Mongolied het ook nie daaraan gedink nie, sy herhaal maar net soos ’n papegaai wat vir haar gesê is.

“Snaaks, want so ’n paar weke terug toe julle my gebel het oor armblankes is daar vir my gesê dat julle my nommer by Alet [met geen van] gekry het. Was Alet eintlik net hoofkantoor wat my laasweek gebel het?”

“Ons hou baie byeenkomste by die Voortrekkermonument, waar mense ander mense se kontak besonderhede vir ons gee.”

Die gebruik van die woord byeenkoms laat my nog altyd dink aan my Voortrekkerdae in die laerskool. Deesdae is dit lyk my ‘n manier om die Afriforum Musiekfees te beskryf.

“Ek sal sekermaak dat meneer se naam van die lys afgehaal word.” Weereens sê sy dit só dat ek moet verstaan hierdie ongemaklike gesprek is my skuld. Asof Mongolied nie eers besef het dat sy die foon opgetel het en my gebel het nie.

Afriforum se motivering is die probleem

Wat my bloed laat kook is nie die feit dat Afriforum my net klakkeloos bel oor hulle klaarblyklik my nommer by een of ander persoon gekry het nie. Ek was nie kwaad omdat Mongolied besig was om my tyd te mors nie; sy doen immers maar net haar werk.

Ek was kwaad oor daar aangeneem word ek gee nie om oor moord nie, net omdat ek gesê het ek gee nie om oor sport nie. Ek gee baie daaroor om, eintlik, want ek is ’n mens wat omgee oor ander mense. ’n Vriend van my se ouers is nou die dag slagoffers van ’n plaasaanval gewees. Albei het in die hospitaal opgeëindig. Moord is walglik, en die feit dat julle dit in my gesig gooi bewys waarom ek julle nie ondersteun nie: Fearmongering.

As julle en julle handlanger Steve Hofmeyr (Solidariteit) soveel tyd en geld spandeer het aan arm mense help soos wat julle daaraan spandeer om mense bang te praat, dan sou julle al ’n baie groter verskil gemaak het as wat julle tans maak. En dan beledig julle ook nog die mense wat julle probeer oortuig om julle te ondersteun?

Ek dink julle het al goeie goed gedoen. Hou aan met dit. Los die bullshit. Ek wou op ’n stadium iemand van Afriforum Jeug op die gevaaalik.com podcast kry, maar nou is ek bang julle stuur vir my nog iemand soos Mongolied. Iemand wat in plaas van met my praat en met my ’n ander perspektief probeer deel, ’n ideologie op my probeer afdwing deur my bang te praat.

Respekteer ook asseblief my privaatheid. Moet my nie bel nie – maak nie saak waar jy my nommer gekry het nie. Julle laat my ongemaklik voel. O, en ek hou van sport. MMA is ’n sport.

*Mongolied is ’n naam was as volg uitgespreek word Mongo- (soos mango met ‘n o in plaas van ‘n a) lied (soos gelieg in Engels: You lied). Die naam is ook ’n skuilnaam om Mongolied se identiteit te beskerm.