Eskom: My opinie

Kom ek pis jou gou af. Ahem. LOAD SHEDDING! Nuff said.

Die vloekwoord.

As mens dink aan relevante onderwerpe in ons land, is Eskom verseker tans in die top 5. Laas Vrydag is ek by ‘n troue. Die seremonie van 45 minute is 3 keer onderbreek deur load shedding. Ek is oortuig dat die paartjie vir die res van hulle lewe load shedding gaan onthou. Vir ‘n R 100,000.00 + troue verwag mens seker ‘n kragopwekker as standaard (given die situasie waarin ons land is) maar nou ja. Name sal nie genoem word nie.

Om my opinie oor Eskom en die land se situasie te lug gaan my verseker in die moeilikheid laat beland, so ek het besluit dat navorsing ‘n beter geweer as probeer is. So here goes:

In ‘n Pdf dokument wat te vinde is op Eskom se webtuiste verduidelik hulle dat load shedding die volgende is:  “Dit is ‘n laaste uitweg om die ineenstorting van die kragstelsel in Suid-Afrika te voorkom. Wanneer daar ‘n wanbalans tussen die vraag en aanbod na krag is, kan hierdie wanbalans ‘n nasie-wye “blackout” tot gevolg hê. So ‘n gebeurtenis sal katastrofiese gevolge hê, en dit kan dae neem om dit reg te stel.” Dan raak hulle nog ‘n paar eenderse uitlatings kwyt.

Dit is belangrik om na die huise rondom jou te kyk voor jy begin vingers wys.

Hulle kan basies net die volgende sê: “Ons het X hoeveelheid krag by ons stasies. Suid-Afrika wil Y hoeveelheid gebruik. X is tans heelwat minder as wat Y is. Do the math.” Mens hoef nie ‘n aktuaris te wees om uit te figure dat dit ‘n groot fokkop sal versoorsaak as daar geen elektrisiteit is vir ‘n paar dae nie. Ons is vir meeste belangrike dinge afhanklik van elektrisiteit. Sonder elektrisiteit sal baie vulstasies wat nie kragopwekkers het nie geen brandstof kan pomp nie. Behalwe vir die feit dat baie mense dan by die huis gaan sit, sal hul kragopwekkers ook nie werk nie.

Optimistiese paartjie wat sonder krag sit. Geen idee wie hulle is nie.

Nou, hoekom is daar load shedding? Volgens die Eskom Pdf: “In die laaste dekade was daar ‘n stelselmatige en konstante toename in die vraag na elektrisiteit in Suid-Afrika as gevolg van ekonomiese groei. Hierdie toename in vraag het tot gevolg gehad dat Eskom se surplus elektrisiteitsreserwes uitgeput geraak het.” Ek kan onthou dat daar ‘n expert dude op ‘n onlangse Carte Blanche episode geraadpleeg is hieroor.  Hy reken dat Eskom al meer as ‘n dekade terug gewaarsku is dat dit gaan gebeur, en dat hulle niks daaraan gedoen het nie. Ek het ook al gehoor dat daar (OBVIOUSLY) gereeld baie belangrike onderhoud op hierdie reusagtige kragstasies gedoen moet word, maar dat daar nie hiervoor voorsien is deur die nuwe big shots van Eskom nie. In my opinie dink ek die scenario was as volg: ‘n Onbevoegde persoon word aangestel in ‘n sleutelposisie. Hy moet verskriklike belangrike besluite neem, maar hy is nie kundig genoeg om hiervoor te voorsien nie.  Hy word gewaarsku daaroor deur mense wat weet waarvan hulle praat, en dit gaan by die een oor in en by die ander uit. Want hy is te besig om te dink aan sy kief boot en huis wat hy met sy lekker bonus gekoop het.

Die huidige CEO van Eskom, Tshediso Matona. Hy verdien tans oor die R22 miljoen ‘n jaar, terwyl sy maatskappy kla hulle het nie geld nie. Doos.

Kan mens hierdie onbevoegde siele aanspreeklik hou? Wees realisties. As iemand jou in ‘n posisie aanstel waar jy 20 keer jou salaris kry sonder nagevolge (want daar is nie veel vir die grootkoppe in ons land nie. Net ‘n “The matter is pending due to further investigation” of iets soortgelyk) sal 99% van mense instem. Imagine jy kom vir ‘n jaar weg daarmee en word afgedank – dan het jy 20 jaar se normale salaris verdien. Dit is nou luuks.

Hierdie post is sover baie depressing. Ek het aan ‘n paar moontlike oplossings asook ‘n paar voordele van ons krisis gedink. Noem my sommer Scuba Silver Lining.  Twee vanselfsprekende en relevante oplossings is natuurlik sonpanele en wind turbines. Ek dink die kanse is goed dat een of ander super ryk persoon binne die eerste helfte van 2015 half tot ons redding gaan kom met een van die twee as oplossing. Die wind in die Kaap en Oos-Kaap waai seker 95% van die tyd, so die wind turbines kan daar werk. Daar is ook plekke soos die Kalahari waar daar fokken morge se oop spasie is waar sonpanele gaan werk.

Wind Turbines

Sonpanele

Ek weet daar gaan baie logistieke issues wees met hierdie twee “oplossings”. Ek dink die geld wat weggemoer is op Nkandla behoort ‘n groot hap uit daardie probleme te vat. Daar is boonop heelwat miljardêrs wat kan help man. Hulle gaan mos hierdie krag verkoop, nie weggee nie. Douw Steyn reken mos hy wil teruggee aan die land.

Voordele? Ek het hierdie naweek saam met die familie gesit en so ‘n paar keer load shedding gehad. Dit het my weereens laat besef hoe fucked die Westerse populasie is. iPads, iPhones, Facebook, Twitter en televisie is die grootste varke in die verhaal. Die van julle wat bevoorreg genoeg was om in die 80’s en 90’s groot te word, sal my hopelik hier ondersteun. As jy weer in enige publieke plek is, let bietjie op na die mense. Mense sit aan tafel saam, dan sit ELKE LIEWE PERSOON meeste van die tyd op sy selfoon/iPad en rondfok. Dan as Pappa iets te sê het, en dan geïrriteerd iets soos “Hoor julle my?!” sê, doen almal daai semi-opkyk ding waar die koppie draai na die persoon wie praat maar die ogies bly op die skerm, en sê iets in die lyn van “Ja ja, ek luister, gaan aan.” Dit is al hoe hulle aandag vir ‘n oomblik afgetrek kan word.

Die status quo in die Westerse samelewing. Hoe romanties.

Ek het tydens die load shedding die naweek agtergekom dat dinge soos ‘n lekker game Rummi of ‘n potjie Monopoly nogsteeds moerse lekker kan wees. Wat van iets soos, en ek weet dit klink seker vir die jonger garde baie simpel, ‘n entjie stap? Wat van oefening? Wat van gesels met die mense wie die naaste aan jou is? Verken bietjie die natuur – ons bly seker in die mees diverse natuurlike habitat op aarde.

‘n Familie wat “tyd saam spandeer”. Ek weet dit klink weird, maar probeer dit bietjie. Let op die awesome lepelversameling.

Mense is baie meer gepla oor die opinies van onbekende (en partykeer opgemaakte) mense op die Internet as die mense wat hulle lief het. Baie mense het nie meer stokperdjies nie, baie doen nie meer sport nie. Alles is op die blerrie TV of op jou rekenaar/personal device. Probeer bietjie old school dinge soos die bogenoemde, jy sal verbaas wees hoe lekker dit kan wees.

Laat ek maar op daardie noot stop. Ek mag dalk bietjie te optimisties klink, maar miskien (of dalk hopelik) sal die volgende paar jaar se load shedding tog ‘n paar goeie gevolge hê.